«Hää?»Dichter Innenteil

hää?

oda:

vo d männa kriagn ma hüünaaugn,

auf dee ma uns jezd sööba haun.

bin i empfindlich wegn dem titl?

hoit, do hob i glei des mittl!im beisl untn sog i de leit:

«nehmts eich a bia und a bissl a zeit.

do gehts um a lesung, um eanste sochn,

gustl, du trottl, hea auf zum lochn

wos sogts ees zum weatal weib

is jo eh eicha zeitvatreib?!

und, wos, des is aa mei ding

sogts zu weibahäppening?»

do sogt da kööna blizschnöö drauf:

«des klingt fia mii noch peachtnlauf.»

na, seavas-na, pfiat di-na, des faungt guat au

weu dee möödung, de schiabt mei mau!

da fraunz sogt: «wüüstas gaunz genau?

sowos is kaa guade frau

a bissl a kraumpn

ned direkt a schlaumpn

oba a need wiaklich guat

auf soo ane hau i in huat!»

da koal sogt: «i maans jo ned bees,

oba waunnsd wüüst, sog i da dees:

des is kaane desd heirotsd,

nua ane desd eibrotsd,

und daunn du waasd eh,

und daunn losst as steh.»

«vüü männa sogn des in da fettn,

weu sa se dahaam so gfrettn »

«na», sogt da gscheade «bei uns is neutral,

ned goa so schiach und fost noamal.»

«jo», sogt da tischla «jo, wia mas nimmt »

«bitte dees stiiiimmt»,

sogt da zweite ausn buagnlaund,

draht si um und speibt si aufs gwaund

und foit untan tisch

«des is fia de fisch,

wos dea deppate red

bei uns sogt mas ned!»

«oba a supaweib gibts und des is doch scheeh!»

«a deppate gööbe, mit keabchen in d!»

dees kompliment is wiaklich zum scheissn,

und a sunst is zum hoaausreissn:

jo i hobs kapiat

aa waunns mi stiat!

i red no iba melioration und pejoration;

wos genau wuascht is-sie vesteh nix davon.

oba, leitln, es hobts jo recht,

und eicha sproch, aa de is echt

is genau dea soziolekt,

aa waunn des kaan schmeckt

nua ned gekünstlt in «literatua»,

drum kummts eich heit vüü heata vua;

de aanfochn leit mit eanara sproch,

de sogn eich wias wiaklich is

und i sitz do und i loch!

Dieser Text entstand anlässlich der Lesung «Weiba Häppäning», die die Österreichischen Dialektautorinnen (ÖDA) und der AUGUSTIN am 2. März veranstaltet haben. Radio Augustin bringt am 23. März um 15 Uhr auf ORANGE 94.0 eine einstündige Zusammenfassung dieser literarischen Soirée. Mitwirkende: El Awadalla, Heidi Gross, Jella Jost, Andrea Pesata, Elis Rotter und Christine Werner.